Ginpahayag sang Department of Education (DepEd) Capiz ang mga panugyan kag basehan sa patas nga pagpanagtag sang MacBook Neo laptops sa mga public school teachers bilang kabahin sang tikang sang gobyerno sa pagpauswag sang digital transformation sa sektor sang edukasyon.
Sa interview sang Bombo Radyo kay Ma’am Yzarda Ballera, Division Information Officer sang DepEd Capiz, iya ginpahayag nga ang pagpanagtag sang mga laptop katuyyan sini nga mahatagan sang masaligan nga kagamitan ang mga manunudlo agud mapadasig ang ila pagtudlo, paghimo sang instructional materials, paggamit sang online learning platforms kag pagtuman sang administratibo nga mga buluhaton.
Suno kay Ballera, prayoridad sa pagpanagtag ang mga public school teachers nga wala pa nakabaton sang laptop halin sa gobyerno ukon sa eskwelahan agud malikawan ang pagdoble sang kagamitan sa iban nga manunudlo samtang may yara pa sang mga wala nakabaton sini.
Dugang pa niya, dako ang mabulig sang mga laptop sa pagpauswag sang kalidad sang edukasyon bangud makabulig ini sa pagpaathag sang mga leksyon paagi sa multimedia presentations, simulations kag paggamit sang DepEd learning resource portals. Makabulig man ini sa pagpaiban sang oras nga ginagahin sang mga manunudlo sa mano-mano nga mga paperworks agud mas makatutok sila sa pagtudlo kag paggiya sa mga estudyante.
Ginpahayag man niya nga kinahanglan may aktibo nga teaching assignment kag aktibo nga DepEd email account ang mga kwalipikado nga manunudlo agud masiguro nga ang mga kagamitan sang gobyerno mapanagtag sa mga aktuwal nga nagatudlo sa mga estudyante.
Ginklaro man ni Ballera nga kwalipikado gihapon nga makabaton sang government-issued laptop ang mga manunudlo nga may personal nga laptop, bangud indi ini kabahin sang propiedad sang gobyerno.
Apang ginpahanumdom niya nga ang mga laptop nga ipanagtag sang DepEd isa ka propiedad sang gobyerno kag kinahanglan ini nga isauli kon ang manunudlo mag-resign, mag-retire ukon magbalhin sa iban nga ahensya.
Sa karon, ginpahanumdom sang DepEd Capiz nga indi pa tanan nga manunudlo sa probinsya ang makabaton sang laptop sa amo nga tion, apang padayon ang ila panikasog nga mapadasig ang procurement kag maipadala ang mga unit bisan sa pinakamalayo nga mga eskwelahan.
Nagpanawagan man si Ballera sa mga manunudlo nga mapuslan sing husto ang mga laptop nga ila mabaton agud mangin dako ini nga bulig sa ila pagtudlo kag sa pagpauswag sang pagtuon sang mga estudyante.
