Padayon ang pagmonitor sang Department of Education (DepEd) Region 6 sa pagsulod kag paggwa sang mga estudyante kag school personnel sa mga buluthuan sa Western Visayas.
Ini kasunod sang shooting incident sa Ateneo de Zamboanga University sa Zamboanga City nga nagresulta sa pagkapatay sang duha ka mga estudyante.
Sa interview sang Bombo Radyo kay Mr. Hernani Escullar Jr., spokesperson sang DepEd Region 6, iya ginpahayag nga padayon ang pagpatuman sang hugot nga security measures sa mga buluthuan agud masiguro ang seguridad sang mga estudyante kag personnel.
Suno kay Escullar, lakip sa mga preventive measures ang body inspection kag pagmonitor sa mga ginadala nga butang sa sulod sang eskwelahan, ilabi na ang mga ginadumilian ukon prohibited items.
Padayon man ang pagmonitor sa mga CCTV cameras kag paglibot sang mga school personnel sa nagkalain-lain nga bahin sang eskwelahan agud gilayon nga matukiban kag matapna ang posible nga security threats.
