Ginhiwat diri sa Roxas City ang DepEd Regional Management Committee Meeting nga gintambungan sang mga Schools Division Superintendent kag mga opisyal sang Department of Education (DepEd) sa Western Visayas.
Ginpangunahan ang sini nga sinapol ni DepEd Regional Director 6 Cristito Eco, CESO III, kaupod ang mga division superintendent kag iban pa nga key officials sang rehiyon.
Lakip sa mga gindiskusyunan amu ang mga tikang agud mapabakod pa ang kalidad sang edukasyon, mapauswag ang pagserbisyo sa mga estudyante kag maghatag sang mas luwas kag mas maayo nga learning environment sa mga eskwelahan.
Ginhatagan man sang pagtalupangod ang iban pa nga importante nga kinahanglanon kag mga concern sa pagdumala sang mga eskwelahan kag pagpatuman sang mga programa sang DepEd sa bilog nga Region 6.
Paagi sa sini nga regular nga pagtililipon sang mga opisyal, ginapaabot nga mas mapabakod ang koordinasyon kag pagbinuligay sang nagkalain-lain nga Schools Division Office para sa kaayuhan sang mga manunudlo kag labi na gid sang mga estudyante.
