Ginpapakigbahin sang Department of Education (DepEd) Regional Office VI nga madinalag-on kag organisado ang pagbukas sang School Year 2026–2027 sa bug-os nga Western Visayas.
Sa interview sang Bombo RAdyo kay Hernani Escullar Jr., Regional Information Officer sang DepEd Region VI, iya ginpahayag nga nagresulta sang matawhay nga pagsugod sang klase sa rehiyon bangud sa preparasyon sang mga eskwelahan, lokal nga pamunuan, kag iban pa nga stakeholders.
Suno sa iya, antes pa ang aktwal nga pagbukas sang klase, nagpatigayon na sang mga koordinasyon kag pagpanghanda ang DepEd upod sa nagkalain-lain nga ahensya agud masiguro nga kompleto ang pasilidad, guro, kag learning materials para sa mga estudyante.
Pahayag pa niya, ang aktibo nga partisipasyon sang mga ginikanan, eskwelahan, kag komunidad dako ang nabulig agud mapadayon ang maayong implementasyon sang basic education program sa rehiyon.
Ginpasiguro man sang natungdan nga padayon sa paghatag sang dekalidad kag inclusive nga edukasyon para sa kabataan sa rehiyon.
