ROXAS CITY – Magapatuman man sang dropbox system sang enrolment ang mga eskwelahan sa siyudad sang Roxas para sa mga enrollees para sa school year 2020-2021 bangud sang coronavirus disease (COVID-19) pandemic.
Ini ang ginpahayag ni Maribeth Baldonado, Project Development Officer II sang Department of Education (DepEd) Roxas City Division.
Mahibaluan nga sandig sa DepEd Order No. 008 series of 2020, ipahamtang ang mga dropbox kiosks sa mga barangay halls ukon eskwelahan para lamang sa pag-pick up kag pag-drop-off sang Learner Enrollment Survey Forms (LESFs).
Suno kay Baldonado, ini ang gindihon para sa mga ginikanan nga wala sang access sa Internet ukon iban nga pamaagi agud mapa-enrol ang ila mga kabataan sa eskwelahan.
Sa karon suno kay Baldonado, nagdangat na sa masobra 18, 000 ka mga estudyante sa mga pampubliko nga eskwelahan sa siyudad sang Roxas ang nakapa-enrol online.
Ginklaro man ni Baldonado nga sa pihak nga may yara na sang dropbox system, mahimo gihapon nga pinaagi sa online enrolment ang himuon sang ginikanan ukon estudyante.
