ROXAS CITY – Nagpaathag ang Schools Division Superintendent sang Department of Education (DepEd) Roxas City Division natuhoy sa estado karon sang pondo para sa trainings kag pagkaon para sa mga atleta nga magapasakop sa Western Visayas Regional Athletic Association (WVRAA) nga pagahiwaton sa Kalibo, Aklan.
Suno kay Dr. Feliciano Buenafe Jr., may yara sang ginpartenisir nga pondo para sa pagkaon, uniform, toiletries kag transportasyon sang mga atleta kag ini ang na preparar kag na-request na sa Local Government Unit (LGU).
Ang amo nga pondo suno sa iya ang nagalab-ot sa 4.5 milyones pesos kun sa diin ang 2 milyones pesos ang igahatag sang siyudad sang Roxas sa bilog nga delegasyon sang Capiz samtang ang 2.5 milyones pesos ang augmentation sang siyudad para sa atleta, trainers kag coaches sang Roxas City sa public kag private schools.
Ginpahayag pa sini nga may yara man sang budget para sa school-based kag in-house training sang mga atleta.
Apang ini ang naatrasar suno sa iya bangud sang transition sang mga school’s superintendent kun sa diin may mga nangin hilikuton pa sila sa ila daan nga division.
Ginklaro man sini nga sini nga bulan sang Enero naman napapasar ang budget sang school board para sa fiscal year 2020.
Apang ginpasalig ni Buenafe nga igare-imburse ang tanan nga nagasto sang mga atleta, coaches, trainers kag mga ginikanan sa tion nga ma-release na ang amo nga pondo.
