Ginkondenar sang DepEd Schools Division of Roxas City ang pila ka mga mga bayolente nga insidente sa sulod sang mga eskwelahan.
Sa interview sang Bombo Radyo kay Adonis Mosquera, Officer in charge sang DepEd Schools Division of Roxas City, iya ginpahayag nga dapat ang eskwelahan amo ang ikaduha nga puluy-an nga mangin safe kag luwas sa ano man nga katalagman ang mga estudyante.
Suno kay Mosquera, liwat nga iga-review sang ila nga talatapan ang mga security measures sang tagsa ka mga eskwelahan sa private kag public diri sa syudad sang Roxas.
Pahayag pa niya, ila man ginatun-an ang pagbutang sang mga Closed Circuit Television (CCTV) Cameras bilang kabahin sang ila nga tikang para mapalig-on ang pagbantay kag pagmonitor sa mga estudyante, empleyado kag bisita.
Nagpanawagan man sang kooperasyon ang natungdan sa mga kabataan, manunudlo kag ginikanan agud mangin malinong kag matawhay ang bug-os nga school year kag malikawan ang dugang pa nga kaangay nga insidente.
