MANILA, Philippines – Nagpanawagan si Department of Education Secretary Sonny Angara, sang kooperasyon sa tanan para sa kaluwasan sang estudyante matapos ang insidente nga pagpangluthang nga nagresulta sa kamatayon sang duha ka menor de edad sa Ateneo de Zamboanga University sa Zamboanga City.
Suno kay Angara, ang kaluwasan kag kaayuhan sang mga estudyante isa ka concern sang tanan, indi lamang sang public ukon private nga buluthuan.
Sa paghinunanon si Angara upod sa mga opisyal sang university, lokal nga panguluhan sang Zamboanga City kag Philippine National Police “PNP”, para kayuhon ang security protocols kag emergency measures sa tagsa ka eskwelahan.
Pahayag pa niya, indi lamang physical security ang dapat tutukan kundi kinahanglan man ang aktibo nga pagpakigbahin sang komunidad, emotional support kag mental health programs para sa mga estudyante.
Dugang pa sang Education Secretary, importante man ang papel sang mga ginikanan sa pag-atipan sang kaayuhan kag seguridad sang ila mga kabataan, bangud ang isa ka luwas nga palibot nagaumpisa sa sulod sang puluy-an.
Samtang, ginpaabot man ang PNP ang police visibility sa palibot sang mga eskwelahan, lakip ang pagdeploy sang barangay tanod sa mga buluthuan nga wala sang security guards.
Ginapanawagan man sa publiko nga mangin responsable sa paggamit sang social media kag indi magpalapta sang wala pa napamatud-an nga impormasyon ukon sensitibo kag graphic nga mga litrato may kaangtanan sa insidente.
Sa karon ginapahanumdom sang DepEd nga likawan ang paghimo sang konklusyon samtang nagapadayon ang imbestigasyon kag respetuhon ang privacy kag dignidad sang biktima kag tagsa ka pamilya.
