Nagapanawagan ang Department of Education (DepEd) Western Visayas sa mga stakeholders nga maghimo sang mabaskog nga education movement sa rehiyon.
Ini nga paghangkat ang ginhimo ni DepEd-Western Visayas Director Cristito Eco sang nag-deliver sang iya nga Regional Basic Education Report sa pagbukas sang 1st Regional Assembly of Education Leaders.
Sa interview sang Bombo Radyo kay Hernani Escullar Jr., Spokesperson sang DepEd Region 6, iya ginpahayag nga ang labing una nga Regional Basic Education Report ang gintambongan sang masobra 2,000 ka mga school heads sa Western Visayas.
Suno pa kay Escullar, ginpasalig ni Director Eco nga sa masunod nga tatlo ka tuig, pagahatagan sang DepEd-Western Visayas sang maathag nga direksyon ang pagpauswag sang edukasyon sa rehiyon.
Ginduso man niya ang pagpatuman sang isa ka education system nga ang excellence indi lamang para sa pila ka estudyante, kag ang oportunidad sa edukasyon indi dapat nagadepende sa lugar ukon sitwasyon sang isa ka learner.
