Ginpahayag ni House Senior Deputy Minority Leader sang Mamamayang Liberal (ML) party-list nga si Leila de Lima, nga wala sang pulos ang mga pahayag ni Vice President Sara Duterte sa impeachment proceedings samtang wala ini opisyal nga nagapanumpa.
Ini ang reaksyon ni de lima, matapos ginpanginwala ni Sara Duterte nga legal ang iya mga pagkabutang kag wala siya sang gin-atubang nga kaso kriminal samtang ara siya sa gobyerno.
Suno kay De Lima, ang mga pahayag sang Bise Presidente magapabilin nga “istorya” lamang kun indi ini mag-atubang bilang sworn testimony sa ensakto nga proseso sang impeachment.
Ginpahayag man niya nga sa tion sang pagimbestigar dapat ihambal ni Duterte ang iya depensa kag magpresentar sang ebidensya.
Nauna na nga ginreport sa hearing sang House Committee on Justice ang findings sang Anti-Money Laundering Council (AMLC) nga may “covered” kag “suspicious” nga mga transaksyon sa bank accounts ni Sara Duterte kag sang iya bana nga si Manases Carpio.
Dugang pa nga natabo ini sa mga tion nga ginpahayag sang Bise Presidente sa iya SALN nga wala siya sang cash ukon kwarta sa bangko.
Gindugang pa ni De Lima nga indi bastante ang mga pahayag sa press conference ukon media agud sabton ang seryoso nga mga alegasyon.
Ginpasiguro man sang mamalidha nga indi na ini basta alegasyon lamang, kundi may yara na sang materyal nga ebidensya, gani kinahanglan ini sabton sang husto sa nagakaigo nga pagsinapol.
