Ginkumpirmar sang Department of Migrant Workers nga padayon sang mga ini nga ginatun-an ang panawagan nga magka-deployment ban sa Kuwait.
Suno mismo sa tiglikom sang ahensya nga si Secretary Hans Leo Cacdac, may patigayunon nga pagtilipon sa tunga tunga sang duha ka pungsod bilang respeto kag pagkilala sa gobyerno sini.
Apang gin-athag naman sini nga ang pagapatigayunon nga hugot nga restriksyon pag-abot sa deployment sang mga Overseas Filipino Workers ang mas pasangkaron pa.
Dugang pa sini, luyag nila nga mamonitor sang husto ang sitwasyon sang mga Pilipino nga mamumugo ilabi na sa mga domestic helpers sa nasambit nga pungsod.
Bangud sini, plano nga ipatuman sang ahensya ang polisiya nga ‘know your employer approach’ nga may tuyo nga kilala sang aplikante ang iya employer antes pa man ini magbalhin sang pungsod.
Kun sa diin, gintuad ni Secretary Hans Leo Cacdac nga indi lamang ini sa Kuwait ipatuman kundi pati na man sa nagkalain-lain nga mga pungsod nga may mamumugon nga Pilipino.
Samtang, kadungan sang mga pag-strikto, ang kaso naman sang napatay nga Overseas Filipino Worker sa Kuwait nga si Jenny Alvarado ang wala sa gihapon natuldukan.
Suno kay Secretary Cacdac, padayon sang mga ini nga ginahulat ang resulta sa imbestigasyon sang National Bureau of Investigation samtang nakahanda ang kaso nga igapasaka nila sa employer sini.
