Posible nga maakpektohan ang ekonomiya sang Pilipinas sang masobra P226 bilyon tubtob P232 bilyon kun ipatuman ang total deployment ban sang Overseas Filipino Workers (OFWs) sa Middle East.
Suno kay Department of Economy, Planning, and Development (DEPDev) Secretary Arsenio Balisacan, posible nga matabo ang kapierdihan sang nasambit nga kantidad kon ang ginabanta 550,000 ka mga Pinoy nga nagatrabaho sa rehiyon ang mapabalik sa ila pungsod.
Suno sa iya, katumbas ang nasambit nga kantidad sa halos 65% sang mga remittances ukon kwarta nga ginapadala sang mga OFW halin sa Middle East diri sa Pilipinas.
Bangud sini, dako ang mangin epekto sini indi lang sa mga mamumugon nga Pilipino kundi mangin sa kabilugan nga ekonomiya sang pungsod.
Base sa data sang Department of Foreign Affairs, ginabulubanta may yara sang 2.41 milyon ka mga Pinoy nga nagatrabaho sa nagkalain-lain nga pungsod sa Middle East. Pinakadamo sa ila ang yara sa United Arab Emirates nga may ginabanta 975,000 ka OFWs.
Ginasundan ini sang Saudi Arabia nga may 813,000, Qatar nga may 250,000, kag Kuwait nga may 211,000 nga Filipino workers. Samtang, may yara man sang mga 31,000 ka mga Filipino OFWs sa Israel kag mga 800 ka mga Filipino workers sa Iran.
Ginhatagan pagtamod ni Balisacan nga ang ano man nga tikang nga magalimit sa deployment sang mga OFWs sa Middle East mahimo nga may dako nga epekto sa remittances kag ekonomiya sang Pilipinas.
