ROXAS CITY – Hugot nga seguridad ang ginapatuman sang mga kapulisan sa syudad sang Roxas matapos nga nagbalik na ang misa sa mga simbahan, parokya kag mission stations sa probinsiya sang Capiz sumugod kahapon nga adlaw, Hunyo 10, 2020.
Ini ang kasunod sang pagpahanugot na sang National Inter-Agency Task Force on Emerging Infectious Diseases (IATF-EID) sa mga religious gatherings sa mga modified general community quarantine (MGCQ) areas.
Sa interview sang Bombo Radyo kay Police Lt. Colonel Ricardo Jomuad Jr., hepe sang Roxas City PNP nga nagdeploy sang mga pulis sa tagsa ka simbahan sa siyudad sandig sa mandato man ni CPPO Director Col. Julio Gustilo Jr., sa mga kapulisan sa probinsya.
Nahibaluan nga makit-an ang 24/7 nga presensya sang mga kapulisan sa mga simbahan agud masiguro nga mapabilin nga malinong kag matawhay ang syudad sang Roxas sa tagsa ka magpatigayon sang misa.
Kadungan sang ginapangatubang sa gihapon nga coronavirus disease (COVID-19) pandemic hugot nga ginpatuman sa mga simbahan ang mga health protocols kapareho sang physical distancing kag pagsuksok sang face mask.
Nahibaluan nga nagpahamtang naman sang disinfection area guwa sang simbahan kun sa diin ginapaidalom sa thermal scanning ang mga magatambong misa.
Gilayon man nga gina-disinfect ang simbahan sa tagsa ka matapos ang misa.
