ROXAS CITY – Depresyon ang ginalantaw rason sang mga kapulisan sa pagtuyo sang isa ka preso sa Roxas City Police Station sa pag-utas sa iya kaugalingon nga kabuhi.
Ini ang ginpahayag ni Police Captain Rene Hare sang Roxas City PNP sang mainterview sang Bombo Radyo.
Suno kay Hare nga ba-se sa ila nga pagpangusisa sa iban nga Persons Deprived with Liberty (PDL’s), nagapanglaba ang wala na ginhingadlan nga preso nga isa ka Filipino-Arabian national sa sulod sang ila nga CR sang ila natalupangdan nga may samad ini sa iya nga pulso.
Bangud diri nagpangayo sila sang bulig sa jail officer kag didto nagpanawag sang responde sang Capiz Emergency Response Team (CERT) agud mabulong ang nasambit nga preso.
Sang gin-usisa ang amo nga preso, gin-aku sini nga tuman siya nga nasubuan bangud halos isa ka semana na nga wala makita ang iya asawa bangud ginadumilian karon ang mga preso nga mabisita sang ila himata bilang penalidad sa ila matapos malutsan sang kontrabando ang karsel.
Ginapahanugutan lamang ang ila mga himata nga makadala sang pagkaon apang indi nila mahimo nga makita ang preso sa sulod.
Ginapahayag nga ginbag-od sang nasambit nga preso ang iya nga pulso sa matalom nga porsyon sang semento sa sulod sang CR.
Nahibaluan nga ang nasambit nga preso ang nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
