Lapit na lang nga matapos ang detailed engineering designs sang P189-billion Panay-Guimaras-Negros island bridges project.
Ini ang ginkumpirma ni Department of Public Works and Highways (DPWH) Sec. Vince Dizon.
Suno kay Dizon, ginalauman nga subong nga Setyembre matapos ang desinyo sang isa sa duha ka segments sang proyekto nga amo ang magakonekta sa isla sang Panay kag Guimaras nga may kalabaon nga 4.97 kilometers sea-crossing bridge.
Pahayag niya, 99% completed na ang section A kag sa tion nga matapos ini, ipadala ini gilayon sa National Economic and Development Authority para sa approval.
Dugang pa sang natungdan, ang desinyo naman para sa Guimaras-Negros section nga may kalabaon nga 13.11 kilometers ang yara na sa 85.3% progress.
Ang contract para sa detailed engineering design ang ginpirmahan sang 2023 kag ginalauman nga matapos subong nga tuig.
Samtang ang civil works naman ang magasunod tubtob sa 2032.
Ang gastuhon para sa engineering services ang pagapondohan pinaagi sa loan sa Export-Import Bank of Korea (KEXIM), nga amo ang official export credit agency sang South Korea.
Gin-athag man ni Dizon nga ang pagpondo sa nasambit nga proyekto pinaagi sa KEXIM ang indi apektado sa nangin pronouncement ni South Korean President Lee Jae-Myung sa diin ginpauntat sini ang 700-billion won ukon malapit P28-billion infrastructure loan project nga ipatuman kuntani sa Pilipinas bangud sa isyu sang kurapsyon.
