Nagpaathag ang kampo ni Ronald “Bato” dela Rosa nga ila iaapelar ang desisyon sang Philippine National Police ukon PNP nga kanselahon ang lisensya kag rehistro sang iya mga armas.
Suno kay Atty. Israelito Torreon, wala sang legal nga basehan ang amo nga tikang bangud kinahanglan anay sang pormal nga desisyon ukon mando gikan sa korte antes mabawi ang lisensya sang isa ka indibidwal. Ginpabutyag man sini nga wala pa sang court order ukon conviction batok sa senador.
Samtang, ginkumpirmar sang Police Regional Office 11 nga nahawat na sang kampo ni Dela Rosa ang revocation order para sa iya License to Own and Possess Firearms ukon LTOPF kag mga rehistro sang armas sang nagligad nga Miyerkules.
Dugang pa, ginpahayag sang abogado nga pagahisugtan anay nila ini sang senador antes magdesisyon kon isurrender ang mga armas. Ang pag-revoke sang mga lisensya nagasunod sa padayon nga pagpangita sang mga otoridad kay Dela Rosa may kaangtanan sa ICC arrest warrant batok sa iya.
