Detachment commander sang Cafgu ginluthang- patay sang kaupod
ROXAS CITY – Patay ang commanding officer matapos luthangon sang isa ka katapu sang Civilian Armed Forces Georgraphical Unit (Cafgu) sa sulod sang admin office sa ila nga detachment sa Barangay Daan Sur, Tapaz, Capiz.
Ginkilala ang biktima nga si Staff Sgt. Ronilo Esoy, 40-anyos sang Barangay Dayhagan, Pilar miyembro sang 12IB sang 3ID sang Philippine Army kag detachment commander sang Barangay Daan Sur Patrol base nga nag-angkon sang multiple gunshot wound sa mgkatuhay nga bahin sang lawas matapos tiruhon sang suspek nga si Bonnie Jimenez 39-anyos Cafgu active auxillary nga na-assigned sa Barangay Daan Sur Patrol base kag residente sang Barangay Taganhin, Tapaz.
Sa exclusive interview sang Bombo Radyo Roxas kay Senior Inspector Edwin Luces, ang hepe sang Tapaz PNP, ginpahayag sini nga antes ang krimen naglisensiya ang suspek sa biktima nga mapauli agud mabisita ang iya nga mag-iloy.
Suno kay Luces nga ginpahanugutan ini sang commanding officer apang may paaman pa nga masakit nga tinaga nga ginkaakig sang suspek.
Matapos ang ila nga formation nagsulod si Jimenez sa admin office kag matapos kamustahon ang commanding officer gilayon niya ini nga ginluthang gamit ang m16 rifle.
Gilayon ini nga gin-disarmahan sang asst. detachment commander matapos mahibaluan ang ginhimo nga krimen.
Samtang narekober sang mga pulis nga nagresponde sa krimen ang 15 ka mga fired cartridges.
Yara karon nakahunong sa Tapaz PNP ang suspek.
