Determinasyon kag handum ang nangin sikreto sang Top 8 topnotcher sa Licensure Examination for Teachers.
Sa interview sang Bombo Radyo kay Joane Miles Veedor, tumandok sang Barangay Basiao, Ivisan, Capiz kag nagtapos sang Bachelor of Secondary Education major in Physical Education sa Capiz State University-Main Campus, iya ginpahayag nga sang una, indi man siya isa ka achiever nga klase sang estudyante gani daku gid nga pagbag-o sang nagsulod na ini sya sa college bangud natagaan ini sang chance nga mag-excel.
Suno kay Veedor, daku ang nabulig sang iya kurso sa iya mental health bangud nakahatag ini sa iya sang kalipay kag inspirasyon samtang nagapadayon sa pag-eskwela.
Pahayag pa niya estudyante pa lamang, nagabulig man siya sa pagpangabuhi kag ubra sang iya ginikanan.
Tuman man ang iya pagpasalamat sa Diyos kag pamilya bangud sa iya pagkapasar kag pagkasulod sa Top 10 sang LET.
Dugang pa sang natungdan, excited na ini nga maipaambit sa mga estudyante ang tanan nga iya natun-an sa pag-eskwela kag review kun hatagan na siya sang kahigayunan nga makapagtudlo.
