Determinasyon kag pagsalig sa kaugalingon ang nangin sandigan sang 2x- gold medalist agud makuha ang bulawan nga medalya sa Palarong Pambansa 2026 sa 400-meter dash kag 4×1 relay.
Sa interview sang Bombo RAdyo kay Dave Derobio, iya ginpahayag nga ang iya dedikasyon sa pagpractice amo ang nagbulig sa iya nga malampuwasan ang mga challenges kag makab-ot ang iya handom nga mangin kampeon.
Suno kay Derobio, indi madali ang iya gin-agyan antes makab-ot ang amo nga kadalag-an. Nagkinahanglan ini sang madugay nga preparasyon, disiplina kag pagpaninguha sa kada ensayo agud mapauswag pa gid ang iya kahimtangan bilang isa ka manugdalagan.
Dugang pa niya nga madamo sang mga pagsakripisyo ang kinahanglan himuon sang isa ka atleta, apang ang pagtan-aw sa iya mga tumong kag ang pagbaton sang positibo nga panghunahuna amo ang naghatag sa iya sang kusog nga magpadayon. Nagpasalamat man siya sa iya mga coach, pamilya kag mga kasimanwa nga padayon nga nagasuporta sa iya pagpaninguha sa sports.
Nagalaum si Derobio nga ang iya pagkadaog sa Palarong Pambansa 2026 mangin inspirasyon sa iban nga mga kabataan nga nagapangandoy nga mangin atleta. Gin-aghat niya sila nga indi magpadala sa kapaltahan kag padayon nga magpaninguha, bangud ang determinasyon kag pagsalig sa kaugalingon mahimo nga mangin yawe sa pag-angkon sang kadalag-an.
