Nagapabilin nga daku nga kabalaka sa mga mangunguma sang tubo ang Red-striped Soft Scale Insect (RSSI), padayon ang Provincial Government of Capiz sa pagpangita sang mga pamaagi kag intervension agud mabuhinan ang epekto sini sa mga tanom kag sa pangabuhian sang mga mangunguma.
Subong nga adlaw, Setyembre 2, 2026, pormal nga gintugyan sa Gobyerno Probinsyal sang Capiz ang mga chemical kag nagkalain-lain nga agricultural inputs nga gamiton sa pagpatuman sang RSSI Mitigation Activities. Personal ini nga ginbaton ni Governor Fredenil H. Castro.
Ang mga nasambit nga inputs pagagamiton sa demonstrasyon sang drone spraying sang Entomopathogenic Fungi kag sa aplikasyon sang mga ginarekomendar nga insecticides paagi sa manual spraying.
Ang mga aktibidad pagapatigayunon halin Setyembre 2 tubtob Setyembre 4, 2026.
Buwas, Setyembre 3, mangin isa sa mga lugar ang banwa sang Pilar nga pagasugdan sang drone spraying demonstration. Isa ini ka bag-o nga pamaagi nga ginatun-an kag ginaeksperimentuhan bilang kabahin sang padayon nga pagpangita sang mas epektibo nga pamaagi sa pagpakigbato batok sa RSSI.
Ang demonstration pagadumalahan sang Agricom Visayas Inc., sa koordinasyon sang Regional Crop Protection Center (RCPC), Regional Agricultural Engineering Division, Office of the Provincial Agriculturist, kag Capiz Provincial Department of Agriculture (DA) Office.
Samtang, ang iban nga insecticides ukon kemikal pagagamiton sang mga mangunguma paagi sa manual spraying.
Ang malapad nga epekto sang RSSI sa nagkalain-lain nga bahin sang probinsya wala lamang nakaapekto sa mga tanom nga tubo.
Nakaapekto man ini sa mga pamilya nga nagasalig sa ila mga patubas, sa adlaw-adlaw nga pangabudlay sang mga mangunguma, kag sa ila paglaum nga ang mga uma nga ila ginpangabudlayan makahatag gihapon sang pangabuhian para sa ila pamilya.
Amo ini ang kabangdanan nga bisan pa ginpaidalom na ang probinsya sang Capiz sa State of Calamity bangud sa epekto sang RSSI, wala nag-untat ang Provincial Government sa pagresponde kag pagpangita sang mga solusyon para sa mga apektado nga mangunguma.
Sa pagpanguna ni Governor Castro, nagapabilin nga mabaskog ang mensahe sang Provincial Government sa tunga sang sini nga tion sang kabudlay.
Samtang, bisan mabudlay ang pagpakigbato batok sa epekto sang RSSI, indi gid pagpabay-an sang Provincial Government of Capiz ang mga mangunguma—nga amu ang mga matutom kag mabakod nga bayani sang aton tagsa ka komunidad.
