Ginkumpirmar sang Department of Foreign Affairs (DFA) ang tayuyon nga pagpa-deport sa 24 ka Pilipino nagikan sa Estados Unidos.
Una na nga ginpahayag ni Philippine Ambassador to the US Jose Manuel Romualdez nga na-deport ang mga ini bangud sa ginapahayag kaangtanan sa pila ka illegal activities samtang yara sa US.
Ang deportation ang natabo humalin sang Oktubre 2024, antes pa man nagdaog si US Pres. Donald Trump tubtob sining Enero 18, 2025.
Suno sa DFA, ginalauman nga masundan pa sa mga masunod nga adlaw samtang nagapadayon naman ang pagstrikto sang US sa mga undocumented aliens nga yara sa US, kadungan na man sang pagpungko ni US Pres. Donald Trump.
Bangud diri, naga-apelar ang DFA sa mga Pilipino nga yara sa US nga magbalik na sa pungsod ukon asikasuhon ang pagsalegal sa pagtinir sang mga ini sa nasambit nga pungsod.
Apelar sang ahensiya, mas maayo nga indi na nila paghulaton ang US authorities nga nagapangita sa mga undocumented aliens agud pwersahan nga pabalikon sa tagsa nila ka mga pungsod.
Humalin sang nagpungko si Trump, pila ka serye sang deportation na ang ginpatuman kun sa diin pwersahan nga ginpabalik ang mga undocumented immigrants sa tagsa ka mga pungsod kasubong sang Pilipinas, Brazil, Mexico kag iban pa.
