Ginpasalig sang Department of Foreign Affairs (DFA) nga safe sa gihapon nga makaagi sa Strait of Hormuz ang mga sakayang pandagat nga may bandera sang Pilipinas.
Ini sa tunga sang nagalala nga tensyon matapos ginpahog ni U.S. President Donald Trump nga balabagan ang Strait of Hormuz kasunod sang napaslawan nga peace talks.
Suno kay Foreign Affairs Secretary Ma. Theresa Lazaro, ang Pilipinas kag Iran nagapabilin sa isa ka kasugtanan nga tugutan ang luwas kag wala sang sablag nga pag-agi sang mga sakayan pandagat nga may bandera sang Pilipinas, subong man sang mga seafarers kag oil shipments.
Ginpahayag man sang DFA nga sang damlag lang ginkumpirma sang Iran nga pila ka mga barko sang Pilipino ang safe nga makaagi sa nasambit nga ruta.
Ang Strait of Hormuz isa sa pinakaimportante nga ruta sang pagpadala sang langis sa kalibutan, nga sa diin nagaagi ang daku nga bahin sang pangkalibutanon nga suplay sang langis.
Bangud sa kinagamo sa rehiyon, nagtaas ang presyo sang langis sang nagligad nga mga semana. Apang gin-anunsyo sang Malacañang nga may daku nga rollback sa presyo sang petrolyo umpisa subong nga adlaw, Martes, Abril 14, lakip na ang pagnubo sang diesel, gasolina, kag kerosene.
Padayon nga ginabantayan sang mga otoridad ang sitwasyon sa Middle East agud masiguro ang seguridad sang mga Filipino seafarers kag supply sang enerhiya sang pungsod.
