Ginpasiguro ni Department of Foreign Affairs (DFA) Secretary Enrique Manalo nga yara sa maayo nga kahimtangan ang mga Pilipino sa Estados Unidos tuga sang nagapadayon nga ‘mass deportation’ nga ginapatigayon sa karon sa amu nga pungsod.
Suno kay Manalo, bangud sa reputasyon sang ahensya kag sang pungsod sa padayon nga pakig-angut nila sa mga international leaders, mangin maayo man kag magapabilin nga luwas ang mga Pinoy sa US.
Ginhatagan pagtamod sini ang mga dalagkuan nga kontribusyon sang mga Overseas Filipino Workers (OFW’s) nga nagatrabaho sa mga health care facilities, banking, hotel services kag management sa nasambit nga pungsod.
Samtang, pagsiguro ni Manalo, bukas kag preparado naman nga magbulig gilayon ang embahada sang Pilipinas sa US kun sa tion nga may magakinahanglan sang bulig sang mga ini ukon assistance direkta sa gobyerno sang pungsod.
Matandaan nga 24 ka Pilipino ang una na nga ginpa-deport sang Estados Unidos bangud sa pagkaulamid sang mga ini sa mga krimen kun sa diin gin-umpisahan na ang pagproseso sang ila nga deportation sadtong administrasyon pa ni Biden.
Magapabilin naman suno diri ang pakig-alyansa sang pungsod sa World Health Organization (WHO) bilang ini ang nagapanguna nga prayoridad sang pungsod kag indi na ini magbag-o.
