Padayon ang komunikasyon sang Department of Foreign Affairs ukon DFA sa Philippine Embassy sa New Delhi kag sa Philippine Consulate General sa Kathmandu agud hibaluon ang kondisyon sang isa ka Pinoy nga ginreport nga missing matapos ang massive flash flood sa Nepal.
Base sa report sang Nepal Tourism Board, isa ka Pinoy ang isa sa mga missing matapos ang baha kag landslides nga nag-igo sa Nepal sang Agosto 26.
Ginapakig-angutan man sang DFA ang otoridad sang Nepal agud makumpirmar ang identity kag kondisyon sang nasambit nga Pinoy, subong man mahibaluan kon may iban pa nga mga Pinoy nga apektado kag nagakinahanglan sang bulig.
Suno sa Philippine Consulate, safe naman ang kalabanan sa mga Pinoy sa Nepal samtang nagapadayon ang rescue kag verification operations.
Base sa data sang OWWA kag DFA, may 18 ka mga OFWs nga narecord nga nagatrabaho sa Nepal. Apang suno sa DFA, may kabug-usan nga 128 ka mga Pinoy ang na-record sa pungsod, lakip na ang pila nga nagpakasal sa Nepalese.
