Nagpabutyag sang daku nga kabalaka ang gobyerno kasunod sang airstrikes sang Estados Unidos sa nuclear facilities sang Iran sang nagligad nga semana.
Nagpanawagan ang Department of Foreign Affairs (DFA) sa tanan nga partido nga magbalik sa diplomatic dialogue agud malikawan ang dugang nga paglala sang tensyon sa rehiyon.
Suno sa DFA, gina-draft nila subong ang mga posible nga senaryo kag gina-update ang mga contingency plans sa tion nga magbalos ang Iran paagi sa pag-atake sa mga base-militar sang Estados Unidos sa Middle East.
Talalupangdon nga may ginabulubanta nga 1 milyon nga overseas Filipino workers (OFWs) sa Middle East, kalabanan sa Saudi Arabia, UAE, Qatar, kag Kuwait.
Sa pihak nga bahin, ang pag-atake sang US sa mga nuclear sites sang Iran sa Fordow, Natanz, kag Isfahan nagkuha sang nagkalainlain nga reaksyon sa bug-os nga kalibutan.
Samtang ang Israel kag Canada nagpabutyag sang suporta kag ang UN, UK, France, Australia, kag New Zealand nagpanawagan para sa de-escalation.
Samtang, gintawag ini sang China kag Russia nga “ilegal”, samtang ang Iraq, Oman, kag Qatar nagpaandam sang mas malapad nga mga epekto.
