ROXAS CITY – Nagdangat na sa masobra 7,000 ang pasyente sang sakit nga diabetes sa probinsya samtang yara naman sa 190 ang kaso sang mga nagkalamatay.
Sa interview sang Bombo Radyo kay Mr. Jeiel Mark Ledesma Non-Communicable Diseases Coordinator sang Capiz Provincial Health Office ginpahayag sini nga ang sakit nga nga Diabetes isa ka makahaladlok nga sakit kun sa diin indi kinahanglan pagpabay-an sang isa ka indibidwal.
Ang diabetes nagaresulta ini sang madamo nga komplikasyon sa lawas, magluwas nga makamamatay ini, mahimo ini nga magresulta sang disability sa tion nga indi makontrol.
Ang tuman nga glucose ukon asukar sa dugo, ang nagadala sang apekto sa organs, blood vessels, nerves, kag iban pa nga bahin sang lawas.
Gintuad man ni Ledesma ang tatlo ka sahi sang diabetes, una amu ang Type 1 Diabetes, ini nga kondisyon kung sa diin wala nagahimo sang bastante nga insulin ang lawas, masami nga nagasugod ini sa pagkabata; Type 2 Diabetes, ini nga sahi wala nagagamit sang instakto ang lawas sang insulin rason nga nagataas ang blood sugar levels, ini man ang pinaka-common nga sahi sang diabetes bangud gina-estimate 95% sang mga tawo nga may diabetes ang may yara sini, ka gang katapusan amu ang Gestational Diabetes, ini ang makit-an lamang sa mga babaye nga nagabusong mahimo suno diri nga maka-angkon sang subong sini nga sakit ang isa ka babaye apisar wala ini sang diabetes sumugod sang ginbun-ag, samtang nagadula naman ini pagkatapos nga makabun-ag sang lapsag kag nagabalik sa normal ang hormones.
Pila sa mga sintomas sang sakit nga Diabetes amu ang masami nga pagka-uhaw, masami nga pag-ihi kag masami nga gutom kag wala sa oras.
Sa tion nga makabatyag sini, panugyan ni Ledesma gilayon nga magpalantaw sa doctor agud mahatagan sang nagakaigo nga pagbulong kag indi na maglala pa.
