Gin-untat na sang Department of Information and Communications Technology ukon DICT Cybercrime Investigation and Coordinating Center ukon CICC ang pag-ban sa messaging platform nga Discord.
Sa press conference sang ahensya, ginsiling ni DICT Secretary Henry Aguda nga nakig-angot na ang Discord sa ila pamunuan.
Suno kay Aguda, nakig-angot na ang Discord sa DICT kag CICC kag nagsaad nga maghimo sang madasig nga aksyon kag mga tikang agod mapalig-on pa ang seguridad kag kaluwasan sang mga kabataan.
Ginsiling man sang Discord nga may mga polisiya sila nga kinahanglan pa ayuhon kag hugutan.
Nagpangayo man sang pasaylo si DICT Undersecretary Renato “Aboy” Paraiso, executive director sang CICC, sa mga tawo nga naabala tungod sa pag-ban sa Discord sulod sang pila ka oras.
Ginsiling niya nga ginapaayo na nila ang tanan kaupod ang Discord.
Ginpahayag sang Discord sa CICC ang ila bag-o nga feature nga “Global Teen Experience”. Ang katuyuan sini amo ang pagpasiguro nga ang mga menor de edad makasulod sa mga lugar ukon espasyo sa app nga angay sa ila edad.
Suno kay Discord Senior Public Policy Advisor Vasundhara Singh, ang katuyuan sang bag-o nga feature amo ang pagprotekta sa mga kabataan nga nagagamit sang ila app batok sa indi angay nga mga sulod kag pakig-angot online.
