ROXAS CITY – Personal nga nakigkita ang katapo sang Department of Information and Communication Technology (DICT) Regional Director sa Roxas City Government.
Ini ang ginkumpirmar ni Engr. Lorwell Onglatco, DICT Provincial Director, sang mainterview sang Bombo Radyo.
Suno diri, tinutuyo sang amu nga pakighinala kaupod si Mayor Ronnie Dadivas, amu agud maghinyo sang suporta sa lokal nga gobyerno sang syudad sa pagahamtangan sang Data Transformation Center.
Nahibaluan nga suno pa kay Engr. Onglatco, nominated ang Roxas City nga isa sa Digital City sa 2025, rason sang nasambit nga proposal.
Target sang DICT nga maka-generate sang madamo nga trabaho, pinaagi sa training center.
Sa pagkamatuod, magasugod na ang training sa mga Persons With Disability (PWD) agud mangin online freelancers, sa Hulyo 18, sini nga Lunes, kag ginalauman nga mangin bukas man ini nga programa sa publiko.
Ginahinalaan pa sa karon ang pagpahamtang sang Data Transformation Center ukon Techno Hub sa Punta Dulog Market, Pueblo de Panay, Barangay Lawaan, Roxas City nga amu ang ginproponer nga lugar sang City government.
Nahibaluan nga ang mayor nga opisina sang DICT-Capiz ang nahamtang sa President Roxas, Capiz.
