ROXAS CITY –Wala pa sang may ginauyatan nga numero ukon listahan ang Department of Interior and Local Government (DILG) Capiz Provincial Office sang mga pangalan sang mga barangay officials nga may yara sang iregularidad sa pagpanagtag sang Social Amelioration Program (SAP).
Ini ang ginpahayag ni DILG provincial director John Ace Azarcon sang mainterview sang Bombo Radyo Roxas.
Suno kay Azarcon nga wala pa sila sang order nagikan sa central office sang DILG natuhoy sa mga ginpasaka nga panumbungon ukon reklamo batuk sa mga opisyales sang barangay sa probinsya.
Dugang pa sini nga madamo naman sang nabaton nga reklamo ang talatapan sa mga barangay officials apang nagaagi pa ini sa nagakaigo nga proseso.
Wala man sila direkta nagabaton sang gina-file nga reklamo ukon kaso bangud ginarefer nila ini sa piskalya, Sangguniang Bayan, Sangguniang Panlungsod, Sanggunian Panlalawigan ukon sa ombudsman.
Ginklaro man ni Azarcon nga ginadumilian ang pagpatigayon sang forum shopping bangud ginaseperar ang mga ginapasaka nga kaso partikular na ang civil case kag administrative case rason nga may yara ini sang magkatuhay nga mga venue.
Sa karon, wala pa sila sang may nabaton nga impormasyon ukon instruksyon gikan sa Central Office nga isuspinde ang pila ka mga barangay officials sa probinsya nga nagbayolar sa pagpanagtag sang cash assistance sa idalom sang SAP sang gobyerno.
