Himuon nga prayoridad sang gobyerno ang paghatag sang trabaho sa linibo ka mga Pilipino nga nadulaan sang trabaho kadungan sang permanente nga pagdumili sa operasyon sang Philippine Offshore Gaming Operators (POGO).
Suno kay Department of the Interior and Local Government (DILG) Secretary Juanito Victor ‘Jonvic’ Remulla, magluwas sa mga nauna nga job fairs nga ginpatigayon na sang gobyerno para sa kasubong nga mga mamumugon, may pila pa ka mga job fairs nga nakalinya nga mahimo nila masudlan.
Diri sila makakita sang trabaho, base sa ila mga luyag kag mga ikasarang.
Talalupangdon nga pila ka mga Pinoy POGO workers ang nakasulod na sa trabaho sa una nga mga job fairs nga ginhiwat para sa ila, pila ka bulan humalin sang ginmando sang PBBM ang total ban sa POGO.
Suno kay Remulla, suportado man sang Department of Labor and Employment (DOLE) ang gilayon nga paghatag sang trabaho sa linibo ka mga mamumugon.
Ulihi sa listahan sang DILG amo ang mga trabahador sang sirado nga POGO hub sa Cavite, ang Island Cove Hotel and Resort, sa diin ginabanta 15,000 ka mga Pilipino ang nadulaan sang trabaho. Ginapatihan man nga may yara sang tubtob 15,000 ka mga dumuluong nga mamumugon sa amo nga hub.
Ang amo nga hub una nga nagsira isa ka bulan antes ang deadline.
