Ginklaro ni Department of the Interior and Local Government (DILG) Secretary Jonvic Remulla nga wala pa sang official arrest warrant gikan sa International Criminal Court (ICC) batok kay Senador Ronald “Bato” dela Rosa.
Ginsiling sini nga tubtub subong, wala pa sang may nabaton nga dokumento ang gobyerno nga makapamatuod sa ginaalegar arrest order.
Baliskad ini sa nauna nga pahayag ni Ombudsman Jesus Crispin “Boying” Remulla nga may ginpagwa na nga warrant batok sa senador.
Bangud sini, wala na liwat nakasulod sa senado si dela Rosa humalin sang ginsambit ang ginapahayag warrant, apisar nga padayon ini nga makita sa social media kun sa diin nagapost ini sang pila ka mga litrato.
Suno sa DILG, na-monitor ang senador sa nagkalain-lain nga bahin sang pungsod sang nagligad nga mga semana.
Samtang, ang abogado ni dela Rosa nga si Atty. Israelito Torreon, nagpamalibad nga maghatag sang pahayag, sa pihak sang pagtinguha sang Bombo Radyo nga makuha ang ila dampigan.
Ginmensyonar ni anay Special Envoy to China Mon Tulfo nga ginaalegar may arrest warrant ang ICC batok kay dela Rosa kag nadeterminar na kun diin ang senador.
Apang, wala pa sang kumpirmasyon gikan sa mga ahensya sang gobyerno angut diri.
