ROXAS CITY – Hugot nga iga-monitor sang Department of Interior and Local Government (DILG) ang mga local government units (LGU’s) ilabi na ang mga barangay officials kun ginasunod ang mandu nga pagpaskil sang listahan sang mga benepisyaryo sang Social Amelioration Program (SAP) sang Department of Social Welfare and Development (DSWD).
Ini ang ginpahayag ni DILG-Capiz Provincial Director John Ace Azarcon sang mainterview sang Bombo Radyo.
Suno kay Azarcon nga padayon ang ila pag-monitor pinaagi sa magkatuhay nga mga municipal government operations office.
Ginpahayag ni Azarcon nga kun mahimo, ila ginapanugyanan ang mga barangay officials nga kuhaan sang laragway ang ila ginapaskil nga listahan.
Suno kay Azarcon nga kasunod sang pag-download sang SAP fund sa mga LGU, dapat nga ila ini nga ma-distribute sa sulod sang lima ka adlaw apang bangud sa kaso sang re-validation sa iban nga lugar, posible nga maglapaw diri ang iban nga mga barangay officials.
Mahimo suno kay Azarcon nga magpaskil sang listahan ang mga barangay officials antes ukon samtang nagapadayon ang distribusyon sang nasambit nga ayuda.
Matandaan nga ginmandu mismo ni DILG Secretary Eduardo Año ang pagpaskil sang kada-barangay sang nasambit nga listahan agud mahibaluan sang publiko kag makit-an kun nangin patas ang mga ini sa pagtumod sang SAP beneficiaries kag mahibaluan kun may pinilian ukon pamulitika nga natabo.
Ginpanindugan naman ni Azarcon nga magapanabat ang mga barangay officials nga mapamatud-an nga wala nagsunod sa pagsulundan sa pagtumod sang mga SAP beneficiaries.
