Magapasaka sang administrative complaint kag kriminal ang Department of the Interior and Local Government (DILG) batok sa 45 ka mga opisyal sang Bureau of Fire Protection (BFP), lakip na ang duha ka anay fire directors, bangud sa ginaalegar maanomaliya sa pagbakal sang mga fire truck halin 2018 tubtub 2024.
Ginapahayag nga involved sila sa bid-rigging kag korapsyon nga nagpataas sang presyo sang mga truck.
Ginaalegar man nga ginmaniobra nila ang technical specifications kag bidding rules agud paboran ang mga pinili nga mga supplier, nga nagresulta sa sobra nga presyo sang mga fire truck.
Suno kay DILG Sec. Jonvic Remulla, ang 1,000-gallon nga fire truck nga nagabalor lamang sang ₱5.97 milyon sang 2014 naglab-ot sa presyo nga halos ₱15 milyon sang 2024, nga gintawag niya nga korapsyon kag indi bangud sa inflation.
Bangud sini, 45 ka mga personnel sang BFP lakip na ang mga anay matag-as nga opisyal ang nagapangatubang sang reklamo bangud sa ila gin-alegar pagkunsabo.
Ang pagpasaka sang reklamo batok sa nasambit nga mga opisyal sang BFP ang kabahin sang intensified internal cleansing sang DILG sa BFP agud mapunggan ang korapsyon sa ahensya.
