ROXAS CITY – Magapaguwa na ang Department of Interior and Local Government (DILG) Provincial sang Memorandum Circular No. 2020-041 sa mga barangay officials natuhoy sa pagpatigayon sang synchronized barangay assembly para sa first semester sang tuig 2020.
Suno kay (DILG) Provincial Director John Ace Azarcon sandig sa Memorandum Circular No. 2020-041, gintalana ang barangay assembly sini nga bulan sang Marso, depende sa availability sang mga barangay officials.
Ginamanduan ang mga barangay officials nga magpatigayon sang barangay assembly agud talakayon ang pila ka mga pagsulundan kasubong sang road clearing operation, barangay anti-drug abuse council, seal of good local governance barangay level, disaster risk reduction and management sa barangay, semestral report sang barangay angut sa ila mga aktibidad, finances subong man ang mga problema nga nagaapekto sa barangay.
Magapangatubang sang kaso administratibo ang mga barangay officials nga mapaslawan nga makapatigayon sang barangay assembly.
Matandaan nga sang tinalikdan nga tuig 2019 nagaguwa nga mataas ang compliance sang mga kabarangayan sa probinsya sang Capiz natuhoy sa nasambit nga mandato.
