Ginapabaskog pa sang Department of the Interior and Local Government (DILG) sa Western Visayas ang panawagan para sa mas hugot nga pagbantay sang publiko sa pagpatuman sang Anti-Epal Policy, kasunod sang 18 ka mga reports nga nabaton sang ginapahayag paglapas sang polisa sa sulod lamang sang duha ka bulan.
Sa interview sang Bombo Radyo kay DILG Regional Director Juan Jovian Ingeniero, iya ginpahayag nga importante ang mga reports halin sa publiko agud matukiban ang mga opisyal nga padayon nga nagabutang sang ila pangalan kag laragway sa mga proyekto nga ginapondohan sang pumuluyo.
Suno kay Ingeniero, ang mga nabaton nga reklamo halin sa nagkalain-lain nga local government units sa Region 6 ang ginatipon kag ginapasa sa central office para sa legal nga pag-usisa kag posible paghatag sang nagakaigo nga tikang.
Ginhatagan man pagtamod ni Ingeniero nga katuyoan sang Anti-Epal Policy nga pabaskugon ang pagsalabton sa gobyerno sa pamaagi nga pagsiguro nga ang mga proyekto nga para sa publiko ang nagasentro sa institusyon kag indi sa personalidad sang mga opisyal.
Sa pihak sang mga narekord nga paglapas dugang sang natungdan, na-obserbahan sang ahensya ang positibo nga sabat halin sa mga LGU sa diin madamo na nga local officials ang nagakakas sang ila mga personal nga materyales sa mga pampubliko nga lugar.
