MANILA-Ginapanawagan ni Department of the Interior and Local Government ukon DILG Secretary Jonvic Remulla nga ibalik sa 15 tubtob 19 anyos ang edad sang mga kandidato sa Sangguniang Kabataan ukon SK, bangud suno sa iya, dapat mas malapit sa edad kag eksperyensya sang kabataan ang mga nagarepresentar sa ila.
Ginpahayag ni Remulla ang iya proposal sa Senate Committee on Finance deliberations nahanungod sa proposed 2027 budget sang DILG.
Suno sa DILG chief, mas maayo nga ang mga opisyal sang SK yara sa komunidad kag mas lapit sa kabataan nga ila ginarepresentar.
Ginkwestyon man ni Remulla kon epektibo pa nga marepresentar sang isa ka tawo nga yara na sa 28 ukon 29 anyos ang mga concern sang kabataan, bangud posible nga may pamilya na ukon nagatrabaho na ini.
Sa subong, suno sa kasuguan, kinahanglan nga ang mga kandidato sa SK may edad nga indi magnubo sa 18 kag indi magsobra sa 24 anyos sa adlaw sang eleksyon. Kinahanglan man nga Filipino citizen, registered voter sang Katipunan ng Kabataan ukon KK, kag residente sang barangay sa sulod sang wala magnubo sa isa ka tuig antes ang eleksyon.
Ginpahayag man ni Remulla nga dapat repasuhon ang fiscal autonomy sang SK councils, bangud may kabalaka siya kon preparado na ang mga pamatan-on nga opisyal sa independente nga pagdumala sang pondo sang gobyerno.
Ini ang ginpabug-atan sang DILG chief bangud may mga nagligad nga kaso sang suspension sa duha ka SK chairperson sa Makati City nga nadalahig sa mga alegasyon sang misconduct, lakip ang ginapatihan nga pagpangayo sang 20 porsyento nga kickback halin sa supplier kag paggamit sang mga dokumento nga may peke nga pirma.
Apang ginpahayag ni Remulla nga ang bisan ano nga pagbag-o sa SK dapat magpalig-on, kag indi magpaluya, sa partisipasyon sang kabataan sa pagdumala sang gobyerno.
Samtang, nakatakda ang 2026 Barangay kag Sangguniang Kabataan Elections sa Nobyembre 2, 2026, suno sa Commission on Elections ukon Comelec.
