Nag-sorry na si Department of the Interior and Local Government (DILG) Secretary Jonvic Remulla sa publiko angut sa niyamuhat nga anunsiyo sang iya ahensya sa Facebook may kaangtanan sa suspensyon sang klase kag trabaho tuga sang malain nga panahon.
Gin-athag ni Remulla nga indi niya intensyon nga pakanubuon ang mga ginaagyan subong sang mga pumuluyo. Suno sa iya, tinutuyo lamang sang iya nga estilo nga pamag-anon ang ginabatyag sang publiko sa tunga sang kalamidad.
“Siguro hindi nila ako naiintindihan. Pabiro talaga ako. Hindi ko naman minamaliit ang pinaghihirapan nila… ang pagpapaalala ay ginawa kong mas magaan para hindi negative vibes lagi ang naririnig,” paathag ni Remulla.
Dugang pa sang natungdan, “Kung ‘di naman nila naiintindihan ay humihingi ako ng pasensiya… wala naman akong masamang intensiyon.”
Nag-angkon sang pagpakamalaot ang pila ka post sang DILG sa Facebook, partikular na ang mga linya nga: “Mga abangers, may inaabangan ba kayo? Mamaya na, kain muna ko,” kag “Mga abangers, sarap ng bogchi ko. Sa kabusugan ay nakaidlip nang sandali. Oh eto na inaabangan niyo!” — mga pahayag nga ginatumod ang paghatag sang update sa suspensyon sang klase kag trabaho samtang ginalaslas sang habagat kag Bagyo Crising ang pila ka bahin sang pungsod.
Samtang, dose (12) ka indibidwal ang na-report nga napatay tuga sang malain nga panahon, suno sa Philippine National Police (PNP). Lima sa mga biktima ang nagikan sa Calabarzon, tatlo sa Negros Island Region, kag tig-isa naman sa Metro Manila, Mimaropa, Northern Mindanao, kag Bangsamoro Autonomous Region in Muslim Mindanao (BARMM).
Kadam-an sa mga biktima ang napatay bangud sa pagkalunod kag pagkatumba sang mga puno. Siyam ka iban pa ang nabalhag nga missing samtang pito ang pilason. Ang mga datos ginpaidalom pa sa beripikasyon sang National Disaster Risk Reduction and Management Council (NDRRMC).
Padayon nga ginapanugyanan sang mga otoridad ang publiko nga maghalong kag sundon ang mga paandam kag anunsyo gikan sa gobyerno, ilabi na nga ginalauman nga magapadayon ang epekto sang habagat sa mga masunod nga adlaw.
