Ginalauman nga magasugod na subong nga tuig ang direct flights sa tunga sang Pilipinas kag India.
Kaangut sini, ginpabutyag ni Indian Ambassador to the Philippines Shri Harsh Kumar Jain nga nakit-an nga magataas pa ang people-to-people contacts sa posible nga pagsugod na sang direct flights sa tunga sang duha ka pungsod sa masunod nga mga bulan.
Bangud sini, ginaplano sang flag carrier nga Air India kag IndiGo nga maka-cater sang tayuyon nga flights.
Ang nasambit nga development kasunod sang paglunsyar sang Pilipinas sang bag-o nga tikang para mapataas pa ang turista nga Indian national nga nagibisita sa pungsod para malab-ot ang target sa tunga sang pagnubo sang Chinese arrivals.
Una na nga ginpahayag ni Department of Tourism (DOT) Secretary Christina Frasco sa Indian Republic Day reception sang Lunes nga posible nga magasugod na subong nga tuig ang flights sa tunga sang Manila kag New Delhi base man sa nagapadayon nga negosasyon sa tunga sang mga kaangut nga ahensiya.
Suno pa kay Frasco nga base sa reports gikan sa Department of Transportation, may daku nga posibilidad nga mag-angkon sang direct flights sa Manila apang ginaduso man sang DOT nga makaangkon sang flights nga direkta sa iban pa nga mga destinasyon kaangay sang Cebu kag Clark.
