ROXAS CITY – Disiplina kag paghatag sang importansya sa oras ang pila lamang sa mga nakuha ni 2LT. Ma. Evangeline Duronio matapos nga magpa-idalum sa training agud mangin kabahin sang katapo sang Philippine Army.
Sa interview sang Bombo Radyo kay Duronio, ginpahayag sini nga dako ang iya ginbag-o indi lamang physically, kundi subong man emotionally kag spiritually bangud sa mga ginatudlo sa ila sang tion sang ila nga training.
Suno kay Duronio, matuod nga indi madali nga mangin isa ka miyembro sang Philippine army apang bangud sa iya dedikasyon kag handum nga sundan ang iya amay sa amu nga patag, nagtimakas ini kag ginpamatud-an indi lamang sa iya kaugalingon kundi subong man sa tanan nga mga tawo apisar nga isa siya ka babaye masarangan man niya nga malampuwasan ang tanan.
Mahibaluan nga sa lima nila nga mag-ulutod, siya lamang ang babaye apang, indi ini nangin upang agud sundon ang iya handum nga magserbisyo sa pungsod.
Indi man madula suno diri ang tion nga nakabatyag siya sang kakapoy kag nahambal sa kaugalingon nga untaton lamang ini, apang liwat sini nga ginadumdum ang tanan nga rason kun ngaman yara ini sa amu nga sitwasyon.
Panugyan sini sa mga kabataan nga may handum nga sudlon ang pagiging isa ka suldado, mangin disiplinado sa kaugalingon kag testingan nga sudlon ini tubtob nga malab-ot, bangud nagapati si Duronio nga ang tanan may yara sang proseso kag kinahanglan mu lamang nga magpati.
