ROXAS CITY – Ginpakigbahin sang nag Top 1 sa Registered Master Electrician (RME) Licensure examination nga nagikan sa Capiz, nga ang sekreto sini sa pagpangibabaw sa amu nga pasinawan amu ang disiplina sa kaugalingon kag pagpangayo sang giya sa Ginoo.
Ini ang ginpahayag ni Kin Basa Amata, produkto sang Capiz State University College of Engineering and Architecture, sang mainterview sang Bombo Radyo.
Suno diri, nagsakripisyo man ini sa iya paghampang sang mga online games sa tion sang naga-review ini, pinaagi sa pag-uninstall sang mga mobile apps.
Wala man ini naglaom nga maga-Top 1 sa exam bangud nagpangduha-duha ini sa pila sini ka mga sabat, gani dako nalang ang iya pagpasalamat sa amu nga achievement.
Sa karon, natalana ini nga magakuha liwat sang licensure examination para sa pagka Enhinyero.
Nahibaluan nga nagikan man sa CAPSU ang top 3 kag 7 sa amu nga pasinawan nga amu sanday Christian Degala Huenda kag Henry Mar Bigcas Bebita.
