Ginrefer na sa Committee on Good Government, Ethics and Accountability sa chairmanship ni Sangguniang Bayan Member Christopher Alayon ang ginrender nga privilege speech ni SB member Norman Marcelino sa regular session sang Sangguniang Bayan sang Sigma kaina sang aga.
Ginpahayag ni Vice Mayor Stephen Alayon sang Sigma nga gintugyan na sa komitiba ni SB member Alayon ang pag-imbestigar sa natabo nga pagkadalahig sa tatlo ka mga salakyan sang banwa nga yara sa idalum sang Office of the Mayor.
Paga-imbitahan man ang concerned nga mga indibidwal may kaangtanan sa nasambit nga aksidente kalakip ang office of the mayor sang Sigma agud matumod kun sin-o ang dapat magapanabat sini.
Katuyuan sini nga mahibaluan ang matood nga natabo kag kun diin na sa karon ang nahinambitan nga mga salakyan nga ginalakipan sang Honda CRV, Ford Ranger kag Nissan Terra.
Apang suno sa opisyal ang nakita lamang sini nga yara sa motorpool sang banwa ang Honda CRV apang Ford Ranger kag Nissan Terra wala sini mahibaluan kun diin sa karon.
Nagapati si Vice Mayor Alayon nga may dokumento nga gina-uyatan si SB member Marcelino sang ginbuy-an sini nga diskurso pribilihiyo, bangud indi ini tiaw-tiaw nga isyu.
Kumbinsidido ang opisyal nga indi pamulitika ang nangin privilege speech ni Marcelino bangud concern lamang ang amo nga opisyal sa mga propedad sang gobyerno.
Luyag lamang sini nga masanagan kun ano na ang status sang amo nga mga salakyan nga gintago sa mga katapu sang Sangguniang Bayan sang Sigma sang natabo ang pagka-aksidente sang nasambit nga mga behikulo nga ginapanag-iyahan sang LGU-Sigma.
Ginpanindugan pa ni Alayon nga dapat gamiton ini nga mga salakyan sa official business kag indi sa personal nga interes.
