ROXAS CITY – Ginpanginwala sang dispatcher sang pampasahero nga van sang Lady Maldita nga indi sang madasig magpadalagan ang mga driver sang nasambit nga salakyan nga nagabyahe sa Roxas padulong sa Estancia vice versa, bangud may yara sang GPS ang tagsa ka unit sang salakyan nga naga-monitor sa kadasigon sang ila pagpadalagan.
Sa pagpakig-angot sang Bombo Radyo kay Brags, dispatcher, ginpahayag sini nga madugay na nga driver ang napatay nga si George Acunin kag ini na ang operator sang iya ginamaneho nga van.
Suno pa diri, nga may yara sang limit ang pagpadalagan sang mga driver nga nagalab-ot lamang tubtob 80 kilometros ang kadasigon sang pagmaneho.
Dugang pa sini, gilayon nga ginatawag ang atensyon sang driver kun ini ang maglapaw sa limitasyon ukon madasig na ang pagpadalagan.
Nagapati si Brags, nga wala man sang dapat basulon sa nagluntad nga aksidente bangud wala ini ginalauman nga matabo.
Ginsiguro naman sang pamunuan sang Lady Maldita nga magahatag sila sang bulig pinansyal sa mga napilasan nga pasahero kag magabulig man ini sa himata sang mga napatay nga biktima.
Samtang, nagapadayon pa ang imbestigasyon sang mga kapulisan sa nagluntad nga aksidente.
