Apisar nga wala pa nagaabot sa Pilipinas ang 600,000 nga bakuna kontra sa African Swine Fever (ASF) nga pagabaklon sang gobyerno, ginapreparahan na sang Department of Agriculture ang plano para sa distribusyon sang mga ini.
Sandig sa inisyal nga plano sang ahensiya, 10,000 AVAC vaccine ang dugang nga ipadala sa Batangas kasunod sang nauna nga roll out sang bakuna.
Ang mga ini ang ginbakal pinaagi sang emergency procurement.
Dugang nga 150,000 dose sang bakuna ang ginalauman nga magaabot sa pungsod sa masunod nga mga adlaw nga plano nga pagadal-on sa mga probinsya sang La Union, Mindoro, North Cotabato, Sultan Kudarat, kag Cebu.
Ang iban pa nga binulto nga bakuna nga kabahin sang 600,000 dose nga plano nga baklon sang gobyerno ang pagatungaon sa mga lugar nga una na nga natumod sang DA bilang mga red zone.
Sa karon, nagapabilin nga apektado sang ASF ang 472 barangay nagikan sa 109 ka municipalidad kag syudad.
Ang mga ini ang gikan sa 31 ka probinsya sa bug-os nga pungsod nga yara na sa idalom sang red zone, base naman sa datos sang Bureau of Animal Industry.
Ang pagbakal sa 600,000 doses sang AVAC vaccine ang ginpondohan sang kabug-usan nga P350 million.
