Wala nagauntat ang pagpanagtag sang gobyerno sang syudad sang bugas sa mga apektado nga pumuluyo sang pandemya nga tuga sang COVID-19.
Gin-athag ni Mayor Ronnie Dadivas nga subong nga liwat naman nagataas ang kaso sang COVID-19 kinahanglan kag dapat nga buligan kag suportahan ang mga pumuluyo nga kadam-an ang nadulaan sang trabaho.
Suno sa alkalde nga kasubong ginhimo na nga regular program sang Roxas City government ang rice distribution sa diin kabahin na ini sa Food Security Program sang syudad.
Ginpasalig ni Mayor Dadivas ang napulo ka kilo nga bugas nga mabaton sang mga residente kada bulan sa diin may gin-alokar na nga pondo para diri.
May nakahanda man nga mga food packs sa mga residente nga ipaidalum ang ila lugar sa lockdown bangud sa pagpositibo sang pila ka mga pumuluyo.
Magluwas diri igahatag man sang gobyerno ang kinahanglanon sang mga pumuluyo bangud indi sila makaguha kag makapanindahan.
Pag-abot naman sa infrastructure projects sang syudad, wala ini ginapabayaan sang gobyerno.
Kasubong sa mga road rehabilitation project kag mga streetlights nga kinahanglan mangin mapawa ang palibot.
Na-identify na ang makabig priority roads nga kabahin sang development program sang syudad.
Pabor man si Mayor Dadivas sa pag-aspalto sang pila ka mga karsada bangud pagkamasunod nga adlaw mahimo na ini nga maagyan sang mga motorista.
Sa ini nga bahin, indi maperwisyo ang mga pumuluyo kag mga motorista.
Samtang inagurahan man buwas nga adlaw ang isolation facility gikan sa DPWH sa Hortus Botanicus.
Nahibaluan nga may 16 ini ka mga hulot kag sarang maka-akomodar sang 45-50 ka mga indibidwal.
