PANAY, CAPIZ- Paga-tingbon ang pagpanagtag sang Emergency Cash Transfer para sa mga naapektuhan sang Bagyo Ramil sa banwa sang Panay, Capiz.
Ini agud nga malikawan ang kun ano man nga pagbaisay kag basol sa mga opisyales sang banwa.
Sa interview sang Bombo Radyo kay Mayor Sonny Besa sang banwa sang Panay, Capiz, iya ginpahayag nga bangud sa mga natabo nga indi pag-intidihanay kag pagmahayay sang pila ka mga pumuluyo sa pila man ka mga kaiping nga kabanwahanan, ginpakamaayo sang ila nga talatapatan nga wala sang by-batch sa pagpanagtag nga matabo.
Suno kay Mayor Besa, gin-impormahan na sila sang talatapan sang Department of Social Welfare and Development (DSWD) nga yara na ang pondo para sa 1st Batch sa diin nga ang una nga maka-avail ang yara lamang sa 2,500 ka mga pamilya kag sa masunod naman nga batch ang iban.
Pahayag nya, bangud sa amo nga impormasyon sang nasambit nga talatapan, ginpakamaayo nila nga ginpatago diri ang pondo. Hulaton nalang nga makumpleto agud nga dululungan nga mahatagan ang tanan nga mga apektado.
Nahibaluan nga yara sa kabug-usan 17, 005 ka mga pamilya ang narekord nga naapektuhan sang Bagyo Ramil sa ila nga banwa.
Nagpasalig naman ang natungdan, nga tion makumpleto na ang nasambit nga Emergency Cash Transfer gilayon ini nga ipanagtag sa mga pumuluyo nga naapektuhan sang amo nga bagyo.
Interviewed by Bombo Sunnie Mae Constantino Batencila
