ROXAS CITY – Aminado ang distributor sang isa ka kompanya sang softdrinks nga nanotisyahan sini ang pagmahal sang ila produkto pag-abot sa mga tindahan, apisar nga indi tam-an ka mahal ang presyo nagikan sa ila lebel.
Ini ang ginpahayag ni City Councilor Moreno ‘Moreng’ Gonzaga, distributor sang RC Cola sa syudad sang Roxas kag probinsya sang Capiz, sang mainterview sang Bombo Radyo.
Suno diri, nagtaas gid man ang ila presyo sumugod sang bulan sang Hunyo, sadtong nagkulang ang suplay sang kalamay, kaangay nalang sa isa ka kaha sang 12oz nga sadto yara lang ini sa P140, nga sa karon nangin P167 na ini, sa ila nga distributor.
Apang, ginkakibot lang sini nga pag-abot sa mga magagmay nga tindahan nagalab-ot na sa P18 tubtob P20 ang 12oz nga kuntani ang insakto nga retail sini ang may maximum lang nga P12.
Sa paglantaw ni Gonzaga, halin sa ila bilang distributor nagapatong ang mega dealer, amu man ang dealer, subong man ang retailer tubtob nga mahal na ang mabakal sang mga tag-iya sang tiyangge.
Nagapati ini, nga sa karon nga naga-amat-amat na balik ang ila suplay, maganubo naman ang presyo sang softdrinks sa probinsya.
Paglahog sini sa mga konsumidor, nga mas maayo nalang nga indi anay mag-inom sang softdrinks kun amu ini sa karon ka mahal sang presyo, mag tubig nalang agud malikawan pa ang balatian nga diabetes.
