Padayon nga nagapatigayon sang imbestigasyon ang Division Engineers Office sa nagluntad nga pagkarumpag sang kisame sa isa ka buluthuan sa Don Ynocencio Del Rosario Memorial School, Barangay Dayao, Roxas City.
Sa pagpakig-angut sang Bombo Radyo kay Ms. Maribeth Baldonado, Division Information Officer sang School Division Office, ginpahayag nga tubtob sa karon, nagakolekta pa sang mga impormasyon ang nasambit nga opisina agud nga hibaluon ang gintunaan sang pagkarusdak sang amu nga kisame.
Sa pihak nga bahin, pahayag naman ni Ms. Mary Martinez, Principal sang Don Ynocencio Del Rosario Memorial Elementary School nga sandig man sa panaysayon sang Adviser sang amu nga classroom, suno diri una sila nga nakabati sang nagaragaak nga tunog kaupod sang mga estudyante sini kun sa diin gilayon ini sila nga naguha sa amu nga hulot-klasehan.
Ginpahayag nga nakaguha ini sila gilayon sa amu nga classroom, kag maswerte naman nga wala sang may napilasan sang tion nga narusdak ang amu nga kisame.
Dugang pa nga suno diri gin-chekyar man nila ang status sang tagsa ka mga classrooms.
Samtang, pahayag naman ni Mr. Samuel Malayo, Officer In Charge School Division Superintendent sang School Division Office, sang nahibaluan nila ang amu nga hitabo, gilayon sila nga nagpadulong sa amu nga buluthuan.
Dako ang ila nga pagpasalamat bangud wala sang napilasan sa nagluntad nga insidente.
Matandaan nga narusdak ang kisame sang amu nga buluthuan sang Marso 31,2025.
Samtang ginsuguro naman sini ang ila nga 100 porsyento nga bulig kag pag-responde, ilabi nagid sa tion nga may kasubong sini nga insidente.
