Divorce bill sa pungsod kinahanglan na nga ipapasar – Atty. Fuentes-Bartolome

ROXAS CITY – “Ti-on na nga hatagan sang tsansa kag oportunidad nga mapapasar ang divorce bill”

Ini ang nangin personal nga opinyon ni Atty. Remia Fuentes-Bartolome may kaangtan sa ginaduso nga divorce bill sa senado kag Kongreso.

Sa interview sang Bombo Radyo kay Atty. Bartolome suno diri, ang divorce bill isa ka positibo nga layi kun sa diin mas madali ang mga grounds kag madamo na sang mga pamilya nga na-trapped sa kasal kag indi na epektibo bilang pamilya.

Suno kay Bartolome, may yara man sang naga-exister nga layi sa pungsod Pilipinas kaangay sang Legal Separation, Nullity of Marriage kag Annulment.

Makonsiderar nga voidable marriage ang kasal sang duha ka persona kun wala sa insakto nga paminsaron ang ginkasal ukon gintunto kag ginpapati sa sala nga impormasyon para lamang magpakasal, naga-edad sang 18-anyos ukon manubo sa 21-anyos nga wala sang pahanugot gikan sa mga ginikanan ukon guardian, ang pahanugot ang nakuha pinaagi sa pagpuwersa, pagpamahog ukon paggamit sang impluiwensya, physical incapability kag sexually transmitted diseases kag indi na matratar.

Ang Legal Separation isa ka layi nga nagaseparar lamang sang propiedad sang mag-asawa apang kasal man ini gihapon.

Pahayag sini nga daw kaangay sang grounds sa legal separation ang grounds sa Divorce Bill apang mas madali ini kag may yara sang limitasyon bangud indi dapat magkasugot ang mag-asawa nga magfile sang divorce bangud possible ini ibasura sang korte.

Dugang pa sang abogado nga ti-on na nga ipapasar ang divorce bill kag pagasiguruduhon ang mga grounds agud indi maabuso.

Panugyan sini nga kinahanglan panumdumon sang maayo sang mag-asawa ang ila mangin desisyon kag magkomunikar agud malikawan ang indi pag-intindahanay nga posible tunaan sang pagbulagay kag pagkaguba sang pamilya.