Sulod na sa semifinals sang Australian Open si Serbian tennis star Novak Djokovic.
Ini matapos ang maragtason nga kadalag-an kay Carlos Alcaraz sa score nga 4-6, 6-4, 6-3, 6-4 sa hampang nga nagdugay sang tatlo ka oras kag 37 minutos.
Ginpahayag sang 10-time Australian Open champion nga ginakabig sini nga isa ka maragtason ang hampang.
Bangud sa kadalag-an, malapit niya na nga maangkon ang record nga 25th grand slam agud malabawan si Margaret Court sang Australia.
Sa una nga set, nakuha sang Spanish tennis star ang kadalag-an kun sa diin napilitan nga magtawag ang 37-anyos nga si Djokovic sang medical timeout bangud sa injury sa iya nga hita.
Nagbalik ini sa second set nga may higot na sang bendahe ang iya nawala nga hita.
Nag-angkon sang tuman nga rally ang duha tubtob naglab-ot sa ikaapat nga set kag dalayon nga nakuha ni Djokovic ang kadalag-an. Masunod nga makaatubang ni Djokovic sa semifinals si Alexander Zverev sa adlaw sang Biyernes.
