Ginpataasan sang Department of Migrant Workers (DMW) ang monthly minimum wage kag annual medical checkups kag hospitalizations sang mga Filipino domestic workers ukon maids.
Kabahin ini sang reform package sang ahensya nga nagatuyo sa pagsiguro sang proteksyon kag kaayuhan sang mga Filipino maids.
Sa gahum sang DMW Advisory No. 25 s. 2025 nga ginpirmahan ni Migrant Workers Secretary Hans Leo Cacdac, ipatuman sang departamento ang pagsaka sa bulanan nga sweldo sang mga Filipino maids halin sa $400 pakadto sa $500.
Ang nasambit nga wage increase ang igalakip sa tanan nga kontrata sa trabaho nga ginproseso sang DMW.
Sa bahin naman sang medical checkups kag hospitalization, ini ang igapatuman sa boluntaryo nga basehan kag mangin libre. Sa kaso sang mga aksidente kag balatian nga may kaangtanan sa trabaho, ang mga dumuluong nga ahensya sa pagrekrut kag mga dumuluong nga amo ang magaabaga sang mga gasto.
Gintalana naman sang ahensya nga mag-isyu sang mga pagsulundan sa operasyon para sa tagsa ka bahin sang reforms package.
